Sheher-e-mohabbat, hijr ka mosam, ehad-e-wafa or main
Tu to is basti say khush khush chala gaya, or main ?

Tu jo na ho to jaisay sab ko chup lag jaati hai
Aapas mein kya baatein kertay raat, diya or main

Sair-e-chaman aadat thi pehlay ab mujboori hai
Teri talaash mein chal pertay hein baad-e-saba or main

Jis ko dekho teri hawaa mein paagal phirta hai
Werna hum-mushrib to nahi thay khalkh-e-khuda or main

Aik zamaanay baad FARAZ ye shair kahay main nay
Ik muddat say milay nahi hein yaar mera or main !

Thankx All
Bilkul sahi kaha Mahi
Ye tittle ghazal say alag hai
Or ye tittle is liye rakha gaya hai kiun k is mein mazeed ghazals add kernay ka iraada hai
Yaani aik taweel thread jis mein mukhtalif ghazals share hon gi !

-:||:- Ghazal Bahaana Karoon -:||:-


Zindagi shour say bharpoor mager sannaata
Jaisay dherkan ki aawaazon say udher sannaata

Kitni dil-kash hai meri wehum-ba-kuf tunhaai
Jaisay hungaama-e-hasti ka huner sannaata

Meri ghazlon ko jo perkho to talaatum in mein
Hurf-der-hurf mager dasht baser sannaata

Ab to manzil say mujhay koi sir-o-kaar nahi
Bhaa gaya mujh ko sir-e-raah-guzer sannaata

Yaad k sehra mein phir hijr baser ki main nay
Manzil-e-ishq kajaa, rakht-e-safer sannaata

Main bhanwar ban k uter jaoon ga dil mein kehna
Jis terhan kerta hai terweej-e-huner sannaata

Jaanay kab say hoon main ik khoukla insaan ShihaaB
Bass gaya mujh mein tab hi raat bader sannaata !

-:||:- Ghazal Bahaana Karoon -:||:-


Zindagi jaisay guzerti hai guzer jaanay day
Derd ko ghum k samander mein uter jaanay day

Tor laaoon ga sitaaray bhi falak say aik din
Ik zara zulf muqaddar ki sanwer jaanay day

Kasrat-e-may say madaawaa-e-alam kya keejiye
Baat mumkin hai haqeeqat ho mager jaanay day

Taa-ba-k yun hi adhoora rahay jeewan mera
Mera ho jaa yaa mujhay jaan say guzer jaanay day

Meri aankhon mein ashkon ka samander hai gull
Haan mager saber ka paymaana to bher jaanay day

Teray derr per hi guzer jaaye shab-e-ghum behter
Kon kehta hai mujhay lout k ghar jaanay day

Log kehtay hein duaaon mein asar hota hai
Main nay ker dekhi hein ik umer ShihaaB mager jaanay day !

-:||:- Ghazal Bahaana Karoon -:||:-


Zer-e-hayaat lutaaoon ga chala jaaoon ga
Main apnay zakham sajaaoon ga chala jaaoon ga

Alam uthaaye furaat-e-sukhan pay pohancha hoon
Main baazoo apnay kataaoon ga chala jaaoon ga

Bas itni dair ko rukna hai raah-e-ulfat mein
Zameen pay ashk giraaoon ga chala jaaoon ga

Wafa k dasht mein thehroon ga saans laynay ko
Phir apni laash uthaaoon ga Chala jaaoon ga

Libaas-e-ghum ko pehen ker jahaan mein aaya hoon
Kafan ka rizq kamaaoon ga chala jaaoon ga !

-:||:- Ghazal Bahaana Karoon -:||:-


Zameen pay paoon hein or aasmaan pay sir mera
Ye kaainaat nahi ban saki hai ghar mera

Main nangay paaoon bohat dair ghoomta raha hoon
Tumhaaray sheher ki mitti mein hai asar mera

Tum apnay jism k ik konay mein paray rehtay
Hua na hota ager is taraf guzar mera

Jo eent ubhri thi deewaar say zara baahir
Lahoo-lahaan kiya hai us hi nay sir mera

Glass paani ka main bhar k saath rakhta hoon
Yehi to hai jo ta'arruf hai mukhtasir mera

Chiraagh mujh mein hai yaa main chiraagh mein hoon ShihaaB
Laga hua hai tamaasha idher udher mera !

-:||:- Ghazal Bahaana Karoon -:||:-


Abhi sooraj nahi dooba zara si shaam honay do
Main khud hi lout jaaoon ga mujhay naa-kaam honay do

Mujhay bad-naam kernay k bahaanay dhoondtay ho kiun ?
Main khud ho jaaoon ga bad-naam pehlay naam honay do

Abhi mujh ko nahi kerna hai aitayraaf-e-shikast
Main sab tasleem ker loon ga ye cherchaa aam honay do

Meri hasti nahi anmol phir bhi bik nahi sakta
Wafaayein baich layna per zara neelaam honay do

Naye aaghaaz mein hi hosla kiun tor bethay ho
Jeet jaao gay tum sab kuch zara anjaam honay do !