Gumsum hua awaz ka drya tha wo aik shakhs
Pathar bhi nahi ab wo sitara tha jo aik shakhs
Shyd wo bhi koi harf-e-wafa dhoond raha tha
Chehron ko bare ghaur se parhta tha wo aik shakhs
Sehra ki tarah dair se pyasa tha wo shyd
Badal ki tarah toot k barsa tha wo aik shakhs
Aey taiz hawa koi khabar uss k janoon ki
Tanha safar-e-shauq per nikla tha jo aik shakhs
Ab akhri sitron mein kahin naam hai uss ka
Ahbab ki fehrist mein pehla tha jo aik shakhs
Hathon mein chupaye hue phirta hai kai zakham
Sheshay k khilonon se baihalta tha jo aik shakhs
Murr murr k usse dekhna chahein meri ankhein
Kuch door mujhe chorne aya tha jo aik shakhs
Har zehan mein kuch naqash-e-wafa chor gaya hai
Kehne ko bhare shehar mein tanha tha jo aik shakhs
Munkar hai wohi ab meri pehchan ka Mohsin
Aksar mujhe khat khoon se likhta tha jo aik shakhs