Khuda Jaanay Kaha'n Say ..

Khuda Janay Kaha'n Say Jalway Jana Kaha'n Taq Hay
Wahin Taq Dekh Sakta Hay, Nazar Jiski Jaha'n Taq Hay.

Hum Itni Bhi Na Samjhay, Aql Khoyi Dil Gawa Bhaitay,
Kay Husn-o-Ishq Ki Duniya Kaha'n Say Kaha'n Taq Hay.

Zameen Say Asmaan Taq Aik Sannatay Ka Aalam Hay
Naheen Maloom Meray Dil Ki Viraani Kahaa'n Taq Hay.

Zameen Say Asmaan Taq Asmaan Say Lay Ke Makaan Taq
Khuda Jaanay Humaray Ishq Ki Duniya Kaha'n Taq Hay.

Niyaz-O-Naaz Ki Rudad Husn-O-Ishq Ka Qissa,
Ye Jo Kuch Bhi Hay, Sab Unki Humari Dasta'n Taq Hay.

Khayal-E-Yaar Nay To Aatay Hi Gum Kar Diya Mujhko,
Yehi Hay Ibteda, To Inteha Iski Kaha'n Taq Hay.

Suna Hay Sufiyo'n Say Humnay Aksar Khanaqaho'n Mein,
Kay Yeh Rangeen Bayani Bedam Rangeen Bayan Taq Hay.

- Kalam By Hazrat Bedam Shah Warsi .

Guzishtaa Khaak Nasheenon Ki Yaadgaar Hoon Main,
Mita Hua Saa Nishaan-E-Sar-E-Mazaar Hoon Main.

Nigaah-E-Garm Say Mujhko Na Dekh Aye Dozakh,
Khabar Nahi Tujhay Kis Ka Gunhagaar Hoon Main.

Phir Uski Shaan-E-Karimi Kay Hauslay Dekhay,
Gunaahgaar Yeh Keh Day, Gunaahgaar Hoon Main.

Baday Mazay Mein Guzarti Hay Bekhudi Mein Ameer,
Khudaa Voh Din Na Dikhaye Kay Hoshiyaar Hoon Main.

- Ameer Meenai

Kalam-e-Iqbal

Kabhi Aye Haqiqat-E-Muntazar, Nazar Aa Libaas-E-Majaaz Mein
Kay Hazaaron Sajday Tadap Rahay Hain Meri Jabeen-E-Niyaaz Mein

Na Bachaa-Bachaa Ke Tuu Rakh Ise, Teraa Aaiinaa Hay Vo Aaiinaa
Kay Shikastaa Ho To Aziizatar Hai Nigaah-E-Aaiinaa Saaz Mein

Na Vo Ishq Mein Rahiin Garmiyaan,
Na Vo Husn Mein Rahiin Shokhiyaan
Na Vo Gazanavii Mein Tadap Rahii
Na Vo Kham Hai Zulf-E-Aayaaz Mein

Main Jo Sar-Ba-Sajadaa Kabhii Huaa, To Zamiin Se Aanay Lagii Sadaa
Teraa Dil To Hai Sanam Aashanaa, Tujhe Kyaa Milegaa Namaaz Mein

Kabhii Aye Haqiiqat-E-Muntazar, Nazar Aa Libaas-E-Majaaz Mein
Kay Hazaaron Sajday Tadap Rahay Hain Merii Jabiin-E-Niyaaz Mein