Har su dikhai dete hai wo jalvagar mujhe

kya kya fareb deti hai meri nazar mujhe



Aaya na raas naalaa-e-dil ka asar mujhe

Ab tum mile to kuch nahin apni khabar mujhe



Daalaa hai bekhudi ne ajab raah par mujhe

Aankhein hain aur kuch nahin aataa nazar mujhe



karna hai aaj hazrat-e-naaseh se samnaa

mil jaaye do ghari ko tumhaari nazar mujhe



yaksaan hai husn-o-ishq ki sarmastiyon ka rang

un ki Khabar unhein hai na apni khabar mujhe



main door hun to ruh-e-sukhan mujh se kis liye

tum paas ho to kyon nahin aatay nazar mujhe



dil leke mera dete ho daag-e-"jigar" mujhe

ye baat bhulne ki nahin umr bhar mujhe