Chaend roz aur merii jaan faqat chaend hi roz
Zulm kii cha mein dam lene par majabuur hain ham
Ik zaraa aur sitam sah lein tarap lein ro lein
Apane ajdaad kii miiraas hai maazuur hain ham

Jism par qaid hai jazbaat pe zanjiire hai
Fikr mahabuus hai guftaar pe taaziiren hain
Aur apanii himmat hai ki ham phir bhii jiye jaate hain
Zindagii kyaa kisii muflis kii qabaa hai
Jis mein har ghari dard ke paiband lage jaate hain

Lekin ab zulm kii miyaad ke din thore hain
Ik zaraa sabr ki fariyaad ke thore hain

Arsaa-e-dahar kii jhulasii hui viiraanii mein
Ham ko rahanaa hai par yun he to nahin rahanaa hai
Ajanabii haathon kaa benaam garaan-baar sitam
Aaj sahanaa hai hameshaa to nahin sahanaa hai

Ye terii husn se lipaTii hui aalaam kii gard
Apanii do rozaa javaanii kii shikaston kaa shumaar
Chaandanii raaton kaa bekaar dahakataa huaa dard
Dil kii besuud tarap jism kii maayuus pukaar

Chaend roz aur merii jaan faqat chaend hii roz