Aansoo'on ki roshni mein muskuraana chaahiye
Chashm-e-num ko ye hunar-mandi bhi aana chaahiye

Phool per shabnum ka manzer jab kabhi yaad aa gaya
Hum wahaan roye jahaan per muskuraana chaahiye

Doosron k ghum yahaan aa ker qayaamat ho gaye
Is derr-e-ehsaas say ab lout jaana chaahiye

Baa-khaber rakhna kisi ko ehtiyaat-e-jurm say
Dushmanon k saamnay to aana jaana chaahiye

Jab hansein to yun hansein hum, saari duniya hans paray
Or ager royein to daaman bheeg jaana chaahiye

Hum say kuch bay-daad zehnon ko rujhaanay k liye
Ho koi lehja mager wo shaairaana chaahiye

Doosron ki chaara-saazi doosron ka baar-e-ghum
Khud say milnay k liye hi ik zamaana chaahiye.