یہی نہیں کوئی طوفاں مِری تلاش میں ہے
کہ موسمِ غمِ جاناں مری تلاش میں ہے
وصال رُت ہے مگر دِل کو ایسا لگتا ہے
ستارۂ شب ہجراں مِری تلاش میں ہے
میں فیصلے کی گھڑی سے گزر چکی ہُوں مگر
کسی کا دیدۂ حیراں مِری تلاش میں ہے
یہ بے یقین سی آسودگی بتاتی ہے
کہ ایک قریۂ ویراں مِری تلاش میں ہے
میں تیرِ گی میں محبّت کی اِک کہانی ہوں
کوئی چراغ سا عنوان مری تلاش میں ہے
یہ کیسا خواب تھا دھڑکا سا لگ گیا دِل کو
کہ ایک شخص پریشاں مِری تلاش میں ہے