Merey hamsafar, tujhe kya khabar!
Yeh jo waqt hai kisi dhoop chaon ke khel sa
Issey dekhtey, issey jheltey
Meri ankh gard se at gai
Mere khwab ret mein kho gaye
...Mere hath barf se ho gaye...
Merey bekhabar, terey naam per
Woh jo phool khiltey the hont per
Woh jo deep jaltey the baam per,
Woh nahi rahey!
Woh nahi rahey keh jo ek rabt tha darmiyan woh bikhar gaya
Woh hawa chali!
Kisi shaam aisi hawa chali
Keh jo barg the sar-e-shaakh-e-jaan, woh gira diye
Woh jo harf darj the ret per, woh ura diye
Woh jo raston ka yaqin the
Woh jo manzilon ke ameen the
Woh nishan-e-pa bhi mita diye!
Merey hamsafar, hai wohi safar
Magar ek mor ke faraq se
Terey hath se merey hath tak
Woh jo hath bhar ka tha fasla..
Kai mausamon mein badal gaya
Ussey naptey, ussey kaat'tey
Mere sara waqt nikal gaya!
Tu merey safar ka shareek hai
Main terey safar ka shareek hoon
Pe jo darmiyan se nikal gaya
Ussi fasley ke shumaar mein
Ussi be-yaqin se ghubaar mein
Ussi rahguzar ke hisaar mein
Tera rasta koi aur hai..
Mera rasta koi aur hai!!
SUNO!
HAMEN LIKH KAR KISI LAMHY
KAHEIN MEHFOOZ KAR LO TUM...
TUMHARI YAAD SE DEKHO
NiKALTY JA RAHY HEN HAM.....!!!
[SIGPIC][/SIGPIC]