[Owi]

-:||:- Do Ghari Baat Karay Mujh Pay Ye Ehsaan Bohat -:||:-

Do ghari baat karay mujh pay ye ehsaan bohat
Guftugoo hoti rahay haaye ye armaan bohat

Kaash samjhay k sabab hai wo shakeebaai ka
Werna is dil k lubhaanay ko hai saamaan bohat

Us nay kuch soch k chaahat hi hadein rakhi hein
Main hoon deewaana mohabbat mein, hoon naadaan bohat

Meri shiddat nay usay khouf say do-chaar kiya
Is liye bhi to wo ban jaata hai anjaan bohat

Piyaar k phool ko matloob hai dil ka piyaala
Yun to baazaar mein mill jaatay hein guldaan bohat

Ishq ki raah mein ye soch gawaara na rahi
Her qadam per naye zakhmon ka hai imkaan bohat

Waqt aaya to zara maan na rakha us nay .....
Umer bhar kertay rahay jis pay hum maan bohat.

 

---

•||•––––•||•––•Owi•––•||•––––•||•