[Cute E$hal]

Guzartay lamho mujhay bataao
Ke zindagi ka asool kiaa hai
Tamaam cheezain agar haqeeqat mein aik he hain
To phool kion hai, babool kiaa hai
Jo meri aankhon ke daaeray mein
Hazaar rangon mein muntashir hai
Har aik manzar, har aik aahat
Har aik rastay ka hamsafar hai
Kaheen samandar saa mahw-e-haerat
Kaheen hawaaon saa be-khabar hai
Kaheen bayaaban misaal-e-khaali
Meri he khwaahish ka aks-gar hai
To phir bataao siwaye khwaahish ke
Meray haathoN mein kiaa hunar hai

GharoN say niklo to soch laina
Ke be-gharii ka hasool kiaa hai
DiloN kii tameer mat giraao
Ke khwaahishon ka yehi to ghar hai
Tamaam haathon mein aaienay hain
To kon kis say chupaa hoaa hai
Agar sada ka wajood kaano say munsalik hai
To kon khushboo mein bolta hai
Agar samandar kii had hai sahil
To kon aankhon mein phailta hai
Tamaam cheezain agar yehii haiN
To kon cheezon say maawaraa hai
Kisse khabar hai badalti rutt nay
Puraanay patton say kiaa kahaa hai
Yeh kon baadal say jaa ke poochay
Ke itnay mosam kahan raha hai
Jo aaj dekhaa hai kal nah ho gaa
Koii bhii lamha attal nah ho gaa
Meri nigaahon ke aaieno mein
Ajeeb manzar jhalak rahay hain
Kaheen ujaaloN pay taergi hai
Kaheen andheray chamak rahay hain
Kaheen shagufon mein roshni hai
Kaheen dareechay mehak rahay hain
Kaheen pay sadyaan rukii kharrii hain
Kaheen zamaanay bhatak rahay hain
Safar hai kaisa ke meray paaon
Baghair chalnay ke thak rahay hain

Khaamosh pairro tumharay Saaye mein
Kitni naslon nay dam liyaa hai
Mujhay bataao ke motaron ke
Dhuhwain say pehlay jo gard urrhi thi
Oss ke parday say aanay waalay
Musaafiron mein kamaal kia tha
Mujhay bataao ke mujh say pehlay
Gaye huwon ka jamaal kiaa thaa
Tumhaari aankhain to chaand suraj ki
IbtedaaoN say aashnaa hain
Mujhay bataao ke pehlay suraj ka haal kia tha
Tumhaaray shaanon pe chaandni ki
Taweel zulfain bikhar ke mehkeen
To aasman ko malaal kiaa thaa

Tumhaaray qadmon mein sar jhukaatay
Udaas rastay kii bandagii mein
Sawaal kia tha
Hawaein pehli baar chaleen to
Tumhaaray dil mein khayaal kia tha
Tumhaari shaakhon nay kin ghataaon ki
Beqaraari say nam liyaa hai
Guzartay lamho mujhay bataao
Zameen kis kii talaash mein hai
Sitaaray kiaa cheez dhoondtay hain
Woh kia taaha‘yur thaa jis mein ab tak
Pahaarr gum sum kharray hoye hain
Samandaron ka jamaal kiaa hai
Ke sard chashmay tarrap rahay hain
Badalti rutt ka payaam kiaa hai
Ke peirr uljhan mein parr gaye hain

 

---

[SIGPIC][/SIGPIC]