[life]

حدیث نمبر 303
حضرت ابن عمر رضی اللہ عنہما اور عائشہ رضی اللہ عنہا بیان کرتے ہیں کہ رسول اللہ صلی اللہ علیہ وسلم نے فرمایا: ''حضرت جبرئیل پڑوسی کے بارے میں مجھے مسلسل تاکید کرتے رہے حتیٰ کہ میں سمجھا کہ وہ اسے وراثت میں بھی شریک ٹھہرادیں گے۔''
(متفق علیہ)
توثیق الحدیث:أخرجہ البخاری(44110۔فتح)' ومسلم(2624 و 2625)۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔

 

[life]

حدیث نمبر 304
حضرت ابوذر رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ''اے ابوذر! جب تم شوربے والا سالن پکاؤ تو اس میں پانی زیادہ کرلو اور اپنے پڑوسی کا خیال رکھو۔'' (مسلم)
اور مسلم ہی کی روایت میں ہے کہ حضرت ابو ذر بیان کرتے ہیں کہ میرے خلیل صلی اللہ علیہ وسلم نے مجھے وصیت فرمائی: ''جب تم شور بے والا سالن پکاؤ تو اس میں پانی زیادہ کرلو، پھر اپنے پڑوسیوں کے گھر والوں کو دیکھو اور بھلائی کے ساتھ اس میں سے انہیں پہنچاؤ۔''
توثیق الحدیث:أخرجہ مسلم(2625)(142)، والروایة الثانیة لہ (2625) (143)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔

 

[life]

حدیث نمبر 305
حضرت ابوہریرہ رضی اللہ عنہ سے روایت ہے کہ نبی صلی اللہ علیہ وسلم نے فرمایا: ''اللہ تعالیٰ کی قسم! وہ مومن نہیں، اللہ تعالیٰ کی قسم! وہ مومن نہیں، اللہ تعالیٰ کی قسم! وہ مومن نہیں، عرض کیا گیا: "کون یا رسول اللہ؟" آپ نے فرمایا: ''وہ شخص جس کی شرارتوں سے اس کا پڑوسی محفوظ نہیں''
(متفق علیہ)
اور مسلم کی روایت میں ہے: ''وہ شخص جنت میں نہیں جائے گا جس کی شرارتوں سے اس کا پڑوسی محفوظ نہ ہو۔''
توثیق الحدیث: أخرجہ البخاری (44310۔فتح)، و مسلم(46)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔

 

[life]

حدیث نمبر 306
حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ''اے مسلمان عورتو! کوئی پڑوسن اپنی پڑوسن کے لیے کسی ہدیے کو حقیر نہ سمجھے اگرچہ وہ بکری کا کھر ہی ہو۔'' (متفق علیہ)
توثیق الحدیث کے لیے حدیث نمبر (124) ملاحظہ فرمائیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔

 

[life]

حدیث نمبر 307
حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ''کوئی پڑوسی اپنے پڑوسی کو اپنی دیوار میں لکڑی (کھونٹی یا کیل وغیرہ) گاڑنے سے منع نہ کرے۔'' (پھر حضرت ابو ہریرہ فرماتے ہیں) کیا وجہ ہے کہ میں تمہیں اس (سنت پر عمل کرنے) سے اعراض کرتے ہوئے دیکھتا ہوں، اللہ کی قسم! میں تو اسے ضرور کروں گا۔''
(متفق علیہ)
توثیق الحدیث:أخرجہ البخاری (1105۔فتح)، و مسلم(1609)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔

 

[life]

حدیث نمبر 308
حضرت ابوہریرہ رضی اللہ عنہ ہی سے روایت ہے کہ رسول اللہ صلی اللہ علیہ وسلم نے فرمایا: ''جو شخص اللہ تعالیٰ اور یومِ آخرت پر ایمان رکھتا ہے، وہ اپنے پڑوسی کو تکلیف نہ پہنچائے اور جو شخص اللہ اور یوم آخرت پر ایمان رکھتا ہے، اسے چاہیے کہ وہ اپنے مہمان کی عزت کرے اور جو شخص اللہ اور یوم آخرت پر ایمان رکھتاہے، اسے چاہیے کہ وہ خیر و بھلائی کی بات کرے یا پھر خاموش رہے۔'' (متفق علیہ)
توثیق الحدیث: أخرجہ البخاری (44510۔فتح)، و مسلم (47)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔

 

[life]

حدیث نمبر 309
حضرت ابو شریح خزاعی رضی اللہ عنہ سے روایت ہے کہ نبی صلی اللہ علیہ وسلم نے فرمایا: ''جو شخص اللہ تعالیٰ اور یومِ آخرت پر ایمان رکھتا ہے، اسے چاہے کہ وہ اپنے پڑوسی سے اچھا سلوک کرے اور جو شخص اللہ تعالیٰ اور یوم آخرت پر ایمان رکھتا ہے، اسے چاہیے کہ اپنے مہمان کی عزت کرے اور جو شخص اللہ تعالیٰ اور یوم آخرت پر ایمان رکھتا ہے، اسے چاہیے کہ وہ خیر و بھلائی کی بات کرے یا پھر خاموش رہے۔''
(امام مسلم نے ان الفاظ کے ساتھ روایت کیا ہے اورامام بخاری نے اس کے بعض الفاظ روایت کیے ہیں)
توثیق الحدیث:أخرجہ البخاری (44510۔فتح)، و مسلم(48)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔

 

[life]

حدیث نمبر 310
حضرت عائشہ رضی اللہ عنہا بیان کرتی ہیں کہ میں نے کہا: "اے اللہ کے رسول! میرے دو پڑوسی ہیں، میں ان میں سے کسے ہدیہ بھیجوں؟" آپ نے فرمایا: ''ان میں سے جس کا دروازہ تمہارے زیادہ قریب ہو۔'' (بخاری)
توثیق الحدیث:أخرجہ البخاری (2195۔220۔فتح)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔

 

[life]

حدیث نمبر 311
حضرت عبد اللہ بن عمر رضی اللہ عنہما بیان کرتے ہیں کہ رسول اللہ صلی اللہ علیہ وسلم نے فرمایا: ''اللہ تعالیٰ کے ہاں ساتھیوں (دوستوں) میں سے بہتر ساتھی وہ ہے جو ان میں سے اپنے ساتھی اور دوست کے لیے بہتر ہو اور اللہ تعالیٰ کے ہاں پڑوسیوں میں سے بہتر پڑوسی وہ ہے جو ان میں سے اپنے پڑوسی کے حق میں بہتر ہو۔''
(ترمذی۔ حدیث حسن ہے۔)
توثیق الحدیث: صحیح۔ أخرجہ الترمذی (1944)، و أحمد (1682) و غیرھما باسناد صحیح۔