[life]

حدیث نمبر 238
حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ''مسلمان کے دوسرے مسلمان پر پانچ حق ہیں۔ سلام کا جواب دینا۔ مریض کی عیادت کرنا، جنازوں میں شرکت کرنا، دعوت قبول کرنا۔ اور چھینکنے والے کو (اگر وہ الحمدللہ کہے تو یرحمک اللّٰہ کہہ کر) چھینک کا جواب دینا۔''
(متفق علیہ)

اور مسلم کی ایک روایت میں ہے: ''ایک مسلمان کے دوسرے مسلمان پر چھ حق ہیں: جب تم اسے ملو تو اسے سلام کرو، جب تمہیں دعوت دے تو اسے قبول کر و، جب تم سے خیر خواہی طلب کرے تو اس کے ساتھ خیر خواہی کرو، جب اسے چھینک آئے اور الحمد للہ کہے تو اسے یرحمک اللہ کہہ کر جواب دو، جب وہ بیمار ہوجائے تو اس کی عیادت کرو اور جب فوت ہوجائے تو اس کے جنازے میں شرکت کرو"۔
توثیق الحدیث: أخرجہ البخاری (1123۔فتح)، و مسلم (2162) والروایة الثانیة عند مسلم (2162)(5)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔

 

[life]

حدیث نمبر 239
حضرت ابو عمارہ براء بن عازب رضی اللہ عنہ بیان کرتے ہیں کہ رسول اللہ صلی اللہ علیہ وسلم نے ہمیں سات چیزوں کے کرنے کا حکم دیا اور سات چیزوں سے منع فرمایا: ''مریض کی عیادت کرنے، جنازے میں شرکت کرنے، چھینکنے والے کو جواب دینے، قسم اٹھانے والے کی قسم کو پورا کرنے، مظلوم کی مدد کرنے، داعی کی دعوت قبول کرنے اور سلام کو پھیلانے کا ہمیں حکم فرمایا۔ سونے کی انگوٹھیاں پہننے، چاندی کے برتنوں میں پینے، سرخ ریشمی گدوں کے استعمال سے، قسی کے کپڑے پہننے سے، حریر (ریشم)، استبرق (دبیز ریشم) اور دیباج (ریشمی کپڑے) کے استعمال سے منع فرمایا''
(متفق علیہ)

اور ایک اور روایت میں ہے کہ پہلی سات باتوں میں گم شدہ چیز کی تشہیر کرنے کا حکم دیا۔
توثیق الحدیث: أخرجہ البخاری(1123،فتح) و مسلم (2066)

 

[life]

..... ...
باب 28
مسلمانوں کے عیوب چھپانے اور بغیر ضرورت کے ان کی اشاعت کے ممنوع ہونے کا بیان
اللہ تعالیٰ نے فرمایا: ''بلاشبہ وہ لوگ جو اہلِ ایمان میں بے حیائی پھیلانا پسند کرتے ہیں ان کے لیے دنیا و آخرت میں دردناک عذاب ہے۔''
(سورة النور :19)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔

حدیث نمبر 240
حضرت ابوہریرہ رضی اللہ عنہ سے روایت ہے کہ نبی صلی اللہ علیہ وسلم نے فرمایا: ''اگر کوئی بندہ کسی بندے کی دنیا میں ستر پوشی کرتا ہے تو اللہ تعالیٰ روزِ قیامت اس کی ستر پوشی فرمائے گا۔''
(مسلم)
توثیق الحدیث:أخر جہ مسلم(2590)(72)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔

 

[life]

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔

حدیث نمبر 241
حضرت ابوہریرہ رضی اللہ عنہ سے روایت ہے کہ میں نے رسول اللہ صلی اللہ علیہ وسلم کو فرماتے ہوئے سنا: ''میری پوری امت درگزر کے قابل ہوگی سوائے ان لوگو ں کے جو کھلم کھلا گناہ کرنے والے ہوں گے۔ اور بے شک یہ بھی کھلم کھلا گناہ ہے کہ آدمی رات کو کوئی کام کرے پھر صبح کو باوجود اس کے کہ اللہ تعالیٰ نے اس پر پردہ ڈال دیا، وہ لوگوں سے کہتا پھرے اے فلاں! میں نے گذشتہ رات یہ یہ کیا، حالانکہ اس نے رات اس طرح گزاری تھی کہ اس کے رب نے ا س کی پردہ پوشی کی ہوئی تھی اور صبح کو وہ پردہ چاک کررہا ہے جو اللہ تعالیٰ نے اس پر ڈال دیا تھا۔''
(متفق علیہ)
توثیق الحدیث:أخرجہ البخاری (48610۔فتح)، و مسلم (2990)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔

 

[life]

حدیث نمبر 242
حضرت ابو ہریرہ رضی اللہ عنہ سے روایت ہے کہ نبی صلی اللہ علیہ وسلم نے فرمایا: ''جب لونڈی زنا کرے اور اس کا گناہ ظاہر ہو جائے تو وہ (اس کا مالک) اس پر حد جاری کرے اور اس کو ملامت وغیرہ نہ کرے (یعنی اس پر کوئی سختی نہ کرے) پھر اگر دوسری بار بھی زنا کرے تو پھر اس پر حد جاری کرے اور اس پر کوئی سختی نہ کرے اور اگر تیسری مرتبہ بھی زنا کرے تو اسے بیچ ڈالے خواہ بالوں کی رسی کے بدلے ہی کیوں نہ ہو۔''
(متفق علیہ)
توثیق الحدیث: أخرجہ البخاری (1785۔فتح)، و مسلم (1703)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔

 

[life]

حدیث نمبر 243
حضرت ابوہریرہ رضی اللہ عنہ سے روایت ہے کہ ایک آدمی نبی صلی اللہ علیہ وسلم کے پاس لایا گیا جس نے شراب پی ہوئی تھی۔ تو آپ نے فرمایا: ''اسے مارو پیٹو۔'' ابوہریرہ بیان کرتے ہیں کہ پس ہم میں سے کوئی اپنے ہاتھ سے، کوئی اپنے جوتے سے اور کوئی اپنے کپڑ ے سے اسے مار رہا تھا۔ پس جب وہ چلا گیا تو بعض لوگوں نے کہا: اللہ تعالیٰ تجھے رسوا کرے۔ آپ نے فرمایا: ''تم ایسے نہ کہو۔ اور اس کے خلاف شیطان کی مدد نہ کرو۔''
(بخاری)
توثیق الحدیث: أخرجہ البخاری(7512۔فتح)