[LAMS]

zindage kitni khubsurat hai
yeh who alfaz hen jo mazi men
log ek dusre se kehte the
ab zamana badal gaya hai aur
soch kay zaviey bhi badle hen
zindage ab haseen nahin lugti
ab to is zindage kay chehre par
zulm aur jabar ki kharashen hen
wahshaton ka ghubar phela hai
hai siyah daur be zamiron ka
suraten jin ki misl e insan hen
khaslaten bhuke bherion jesi
botiyan nochte hen apno ki
khoon insaniat ka peete hen
bhuk in ki kabhi nahin mit’ti
pyas in ki kabhi nahin bujhti
kash in bherion kay chungal se
zindage ko nijat mil jaey
zindage phir se muskorane lage
aur sub log phir se kehne lagen
zindage kitni khubsurat hai

 

---