[Owi]

Saat rungon mein tera aks taraasha main nay
Kitnay jazbon say her ik naqsh taraasha main nay

Sab sitaaray teri palkon pay sajaa ker jaana
Phool raston mein mohabbat k bicha ker jaana

Chaand kirnon say tera chehra sajaaya main nay
Teray aanchal ko bahaaron say banaaya main nay

Her sahar ko teray daaman main utaara main nay
Teray aangan ko Musarrat say sanwaara main nay

Sab ghataayein teri zulfon mein saja ker jaana
Or khushboo teri saanson mein basaa ker jaana

Sab say dil-kash tujhay duniya mein bana ker jaana
May-kaday teri nigaahon mein chupa ker jaana

Teray paykar ko mohabbat say taraasha main nay
Apni aankhon say tera husun nikhaara main nay

Tujh ko dherkan ki terhan dil mein basa ker jaana
Lamha lamha tujhay jeewan mein utaara main nay

Saari sochon ko tera aks diya hai jaana
Sab khayaalon ko tera naqsh diya hai jaana

Dil-e-masnad pay tujhay ooncha bitha ker jaana
Apni rug rug mein tera ishq basa ker jaana

Main nay her lamha teray wasl ki chaahat ki hai
Main nay ki hai to faqat tum say mohabbat ki hai

 

---

•||•––––•||•––•Owi•––•||•––––•||•