[life]

نعتِ رسولِ مقبول صلی اللہ علیہ وسلم

یقین کچھ بھی نہیں ہے، گمان کچھ بھی نہیں
جو تو نہیں ہے تو سارا جہان کچھ بھی نہیں

ترے ہی نام سے پہچان ہے مرے آقا ۖ
وگرنہ اپنا تو نام و نشان کچھ بھی نہیں

لبوں پہ نامِ محمد ۖ ہے زمزمہ پیرا
ہمارے فکر کی ورنہ اُڑان کچھ بھی نہیں

ترے ہی دم سے منوّر ہیں بام و در دل کے
جو تو نہیں ہے مکیں تو مکان کچھ بھی نہیں

تجھی سے پائی ہے، تہذیب آدمیّت نے
وگرنہ خاک ہے یہ خاکدان، کچھ بھی نہیں

یہ پیارا نام لہُو میں اگر نہیں ہے رواں
یہ جسم کچھ بھی نہیں ہے، یہ جان کچھ بھی نہیں

دل و زباں پہ رہے بس ہمیشہ صلِّ علیٰ
وگرنہ سعد یہ دل اور زبان کچھ بھی نہیں

سعداللہ شاہ